Meri aankhon ke taare do
Ek dooje se nyaare vo;
Ek surya ka Udai tej hai
Dooja chandra sa Saarthak hai

In do siron ki dhuri par
Ghoom rahi meri dharaa
In do thaton ke beech hi
Chalti meri jeevan nayya

Smaran hai mujhe apne hriday ka
Vo pehla anupam ullaas
Jab ek nayi aahat ka
Hua madhur aabhaas

Apni chhupi athkheliyon se
Tum gudgudaate tan-man
Main apni duniya main khoyee
Dekhti kayee swapn

Pehli baar baahon mein lekar
Umad padaa maatritva
Kya yahi rudhir hai mera
Ya hai mera astitva

Shool tumhe jab chubhte to
Kyon hota mujhko dard
Maa bankar hi jaana maine
Yeh anokha marm

Kilkaari se goonj uthaa tha
Mere man ka aangan
Pal chhin samay beet gaya kab
Kahaan gaya vo bachpan

Kal tak jhukkar batiyaati thi
Tumko tutlakar samjhaati
Ab sheesh uthakar,panjon par uthkar
Mastak tumhara choom paati

Saare jag ki khushiyaan laakar
Bhar di mere aanchal mein
Jaise saagar ki lehren
Samaa jaayen ik baadal mein

Saarthak hua jeevan Udai hokar
Meri mamta ka saar tumhi ho
Mere hriday mein goonji
Sabse madhur jhankar tumhi ho!