Dil ki pyaasi khaamosh jheel par
Ek ghata mandaraati aayi;
Aisa kya hai is baadal mein
Socha dil ne kuchh ghabraakar;

Kyon yeh dabe paanv aaya hai
Bin garjan, bin bijli chamke
Koi hawa na koi aandhi
Na koi barsaat ka mausam-

Phir bhi kyon chupke se aakar
Chhaa gayaa yeh mere aasmaan par
Lagta hai aagosh mein bharkar
Le jaayega door udaakar!

Jheel mein ho boond paani ki
Ya chhupi ho baadal mein
Kehne ko to jal hi hai
Par badli hai uski hasti!

Baadal ki pehli boond se
Kyon sihar gayi ye jheel
Gehraayi tak jaakar jaise
Machaa diya ajab kolaahal

Satah shaant hai lekin bheetar
Jhoom jhoom kar thirak rahi hain
Ek nayi jhankaar par
Lehron ki madhosh sargam!