Kaha tumne bahut kuchh ankaha
ya maine sun liya bahut kuchh ansuna?

Jo zahan main tha hi nahi
kyon aisa dikhlaaya manzar
mahaz chaar shabdon mein jaise
mode di jeevan ki dagar;
yeh kaisa shahteer chalaakar
le gaye mera sukh chain chheenkar
dil par zor chalega kaise
thaami jo tumne jeevan dor
ek hi lamhe mein kaise
paaya tumne yeh adhikar?
kal tak mere antriksh mein
bus do he to the taare
aaj tumhaari ek nazar ne
bichha diye asankhya sitaare!
chhalak utha hai daaman mera
kaise thaamoon khushiyaan apaar
paanv zameen par tikte  nahin hain
khwaabon ke pankh pakheru hain
jo hona hai kal hoga, par 
aaj to mera apna hai

jeewan-sandhya ho saath tumhaare
bus itna sa sapna hai!